ଭୁବନେଶ୍ବର :  (ସଞ୍ଜୟ ମହାନ୍ତି )ବିଜେଡିରୁ ମୁହଁ ଫେରାଇଛନ୍ତି ଓଲିଉଡ ଇଣ୍ଡଷ୍ଟ୍ରିର ଯାଜପୁର ଜିଲ୍ଲା କୋରେଇର ପୂର୍ବତନ ବିଧାୟକ ଆକାଶ ଦାସ ନାୟକ।ଦଳର ସଭାପତିଙ୍କୁ ଇସ୍ତଫା ପତ୍ର ପଠାଇଛନ୍ତି। ୨୦୧୯ରେ ବିନା କାରଣରେ ତାଙ୍କ ଟିକେଟ କଟାଯାଇଥିବାରୁ କ୍ଷୋଭ ପ୍ରକାଶ କରିଛନ୍ତି ଆକାଶ। ଆଗାମି ଦିନରେ କୋରେଇବାସୀଙ୍କ ସହ ଆଲୋଚନା କରି ନିଜର କାର୍ଯ୍ୟପନ୍ଥ ଜଣାଇବେ ବୋଲି କହିଛନ୍ତି ।

ନିର୍ବାଚନ ମଇଦାନରେ ଷ୍ଟାର କ୍ୟାମ୍ପନର ସାଜି ଲୋକଙ୍କ ଭିଡ଼ ଜମାଉଥିବା ଅରିନ୍ଦମ, ସିଦ୍ଧାନ୍ତ,ଅନୁଭବ ଦଳ ଛାଡିବା ପରେ ବିଜେଡିକୁ ଲାଗିଛି ଶକ୍ତ ଝଟକା । ଦଳର ସାଧାରଣ ସମ୍ପାଦକ ଥିବା ଅରିନ୍ଦମ ରାୟ ଓ ଦୁଇ ଦୁଇ ଥର ସାଂସଦ ସିଦ୍ଧାନ୍ତ ମହାପାତ୍ର ବିଜେଡି କ୍ୟାମ୍ପ ଛାଡି ବିଜେପି ରେ ସାମିଲ ହୋଇଥିବା ବେଳେ ଖୁବଶୀଘ୍ର ପୂର୍ବତନ ବିଧାୟକ ଆକାଶ ଦାସ ନାୟକ ଓ ଏବଂ ବର୍ତ୍ତମାନର ସାଂସଦ ଅନୁଭବ ମହାନ୍ତି ବି ବିଜେପି ରେ ସାମିଲ ହେବାକୁ ଯାଉଥିବା କୁହାଯାଉଛି ।

କେବଳ ଏଇ ମାନେ ନୁହଁନ୍ତି ବରଂ ଦଳର ଅନେକ ଆଗ ଧାଡ଼ିର ନେତା ବି ବିଜେଡି ସହ ବର୍ଷ ବର୍ଷର ସମ୍ପର୍କ ତୁଟାଇଛନ୍ତି । ଆଜି ଭୁବନେଶ୍ୱର ଉତ୍ତରରୁ ଦଳର ପୂର୍ବତନ ବିଧାୟକ ଥିବା ପ୍ରିୟଦର୍ଶୀ ମିଶ୍ର ବିଜେଡି ଛାଡି ବିଜେପି କ୍ୟାମ୍ପରେ ସାମିଲ ହୋଇଛନ୍ତି । ସେହିପରି ପୂର୍ବରୁ ତେଲକୋଇ ବିଧାୟକ ପ୍ରେମାନନ୍ଦ ନାୟକ, ଜୟଦେବ ବିଧାୟକ ଅରବିନ୍ଦ ଢାଲି, ଚିଲିକା ବିଧାୟକ ପ୍ରଶାନ୍ତ ଜଗଦେବ ଏବଂ ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀ ବି ବିଜେପି କ୍ୟାମ୍ପରେ ସାମିଲ ହୋଇ ବିଜେଡିକୁ ଦେଇଛନ୍ତି ଆହ୍ୱାନ । ସେହିପରି ପ୍ରତିଷ୍ଠାତା ସଦସ୍ୟ ତଥା ପୂର୍ବତନ ମନ୍ତ୍ରୀ ଦେବାଶିଷ ନାୟକ ଏବଂ ବର୍ତ୍ତମାନର ସାଂସଦ ତଥା ଛଅ ଛଅ ଥରର ସାଂସଦ ଭତୃହରି ମହତାବ ବି ବିଜେଡି ଗଣତନ୍ତ୍ର ନୁହେଁ ଜଣ ତନ୍ତ୍ର ଚାଲିଥିବା କହି ଦଳ ଛାଡି ବିଜେପିରେ ହୋଇଛନ୍ତି ସାମିଲ ।