ସୁବର୍ଣ୍ଣପୁର : (ଅଜିତ କୁମାର ପୁଜାହାରୀ)ସୋନପୁର ପୋଲିସକୁ ମିଳିଛି ବଡ ସଫଳତା l କଣ୍ଟେନର ସହିତ ୩ କୁଇଣ୍ଟାଲ୍ ୭୫ କେଜି ଗଞ୍ଜେଇ ହୋଇଛି ଜବତ l ଏଥିରେ ମଧ୍ୟପ୍ରଦେଶ ରାଜ୍ୟର ୨ ଅଭିଯୁକ୍ତ ଗିରଫ ହୋଇଛନ୍ତି l ବୌଦ୍ଧ ଜିଲ୍ଲା କଣ୍ଟାମାଳ ଅଞ୍ଚଳରୁ ବାହାର ରାଜ୍ୟକୁ ଯାଉଥିଲା ଏହି ଗଞ୍ଜେଇ l ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ସୂଚନା ଦେଲା ସୋନପୁର ପୋଲିସ l ପୋଲିସ ସୂଚନା ଅନୁସାରେ ଗତକାଲି ଏକ ବିଶ୍ବସ୍ତ ସୂତ୍ରରୁ ଖବର ପାଇ ସୋନପୁର ପୋଲିସ ସ୍ଥାନୀୟ କୁଞ୍ଜ ଛକ ଠାରୁ ବ୍ଲକ ଛକ ପର୍ଯ୍ୟନ୍ତ ଟ୍ରାକିଂ କରିଥିଲା l

ଏହି ସମୟରେ ଏକ କଣ୍ଟେନର ଲୁହା ଛଡ଼ ନେଇ ଯାଉଥିବା ବେଳେ ତାକୁ ଜିଲ୍ଲାପାଳ ଅଫିସ୍ ଆଗରେ ପୋଲିସ ପକ୍ଷରୁ ତନଖି କରାଯାଇଥିଲା l ତେବେ କଣ୍ଟେନର୍ ଭିତରେ ୧୫ ବସ୍ତା ଗଞ୍ଜେଇ ଥିବା ଜାଣିବାକୁ ପାଇଥିଲା ପୋଲିସ l ସୋନପୁର ପୋଲିସ ଉକ୍ତ କଣ୍ଟେନର କୁ ଜବତ୍ କରିବା ସହିତ ଗାଡ଼ି ଚାଳକ ଓ ଆଉ ଜଣେ ବ୍ୟକ୍ତିକୁ ଗିରଫ କରିଛି ପୋଲିସ l ଗିରଫ ବ୍ୟକ୍ତି ମାନେ ହେଲେ ମଧ୍ୟପ୍ରଦେଶ ରାଜ୍ୟର ବିନୋଦ ମାଂଝୀ ଓ ବିଜୟ ଗାଭ୍ଲେ l ଉଭୟଙ୍କୁ ଆଜି କୋର୍ଟ ଚାଲାଣ କରାଯିବା ନେଇ ସାମ୍ୱାଦିକ ସମ୍ମିଳନୀରେ ସୂଚନା ଦେଇଛନ୍ତି ଜିଲ୍ଲା ଆରକ୍ଷୀ ଅଧିକ୍ଷକ।