![](https://www.aeiodisha.com/wp-content/uploads/2024/06/WhatsApp-Image-2024-06-06-at-20.58.51.jpeg)
ରାୟପୁର/ଭୁବନେଶ୍ୱର ତା ୬/୦୬ ଛତିଶଗଡ଼ ରାଜ୍ୟ ଭାରତୀୟ ଜନତା ପାର୍ଟି ପକ୍ଷରୁ ଓଡ଼ିଶା ନିର୍ବାଚନ ପାଇଁ ନିଯୁକ୍ତ ସହ-ପ୍ରଭାରୀ ତଥା ରାୟପୁର ନଗର ଉତ୍ତରର ବିଧାୟକ ପୁରନ୍ଦର ମିଶ୍ର ଏକ ବିବୃତିରେ ଉଭୟ ଲୋକସଭା ଓ ବିଧାନସଭା ନିର୍ବାଚନରେ ବିଜେପିକୁ ବିପୁଳ ସଂଖ୍ୟାରେ ଭୋଟ ଦେଇଥିବାରୁ ଓଡ଼ିଶାର ଜନସାଧାରଣଙ୍କୁ ଧନ୍ୟବାଦ ଅର୍ପଣ କରିଛନ୍ତି। ଓଡ଼ିଶାର ମୂଳବାସିନ୍ଦା ଏବଂ ଛତିଶଗଡ଼ର ୩୫ଲକ୍ଷ ଓଡ଼ିଆ ଅଧିବାସୀଙ୍କୁ ନେଇ ଗଠିତ ସମଗ୍ର ଓଡ଼ିଆ ସମାଜର ଅଧ୍ୟକ୍ଷ ଶ୍ରୀ ମିଶ୍ର, ପ୍ରଥମଥର ପାଇଁ ରାଜ୍ୟରେ ବିଜେପିର ଏକାକୀ ଭାବେ ସରକାର ପ୍ରତିଷ୍ଠା ହେବାକୁ ଯାଉଥିବାରୁ ଓଡ଼ିଶାବାସୀଙ୍କୁ ଭବ୍ୟ ବଧାଇ ଜଣାଇଛନ୍ତି।ଲୋକସଭା ନିର୍ବାଚନରେ ଜୟଯୁକ୍ତ ହୋଇଥିବା ରାଜ୍ୟର ୨୦ଜଣ ସାଂସଦ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କର ହାତମୁଠାକୁ ଟାଣ କରିବା ଏବଂ ତୃତୀୟ ଥର ପାଇଁ ତାଙ୍କୁ ପ୍ରଧାନମନ୍ତ୍ରୀ ଗାଦିରେ ଆସୀନ କରିବା ଦିଗରେ ମହତ୍ୱପୂର୍ଣ୍ଣ ଭୂମିକା ଗ୍ରହଣ କରିବେ ବୋଲି ଶ୍ରୀ ମିଶ୍ର ଆଶା ପ୍ରକଟ କରିଛନ୍ତି।
ବିଧାନସଭାରେ ନିରଙ୍କୁଶ ସଂଖ୍ୟା ଗରିଷ୍ଠତା ହାସଲ କରି ମହାପ୍ରଭୁ ଶ୍ରୀ ଜଗନ୍ନାଥଙ୍କର ପବିତ୍ର ଭୂମିରେ ବିଜେପି ଡବଲ ଇଞ୍ଜିନ ସରକାର ପ୍ରତିଷ୍ଠା କରିବାକୁ ଯାଉଥିବାରୁ, ଓଡ଼ିଶାରେ ସୁବର୍ଣ୍ଣଯୁଗର ଅୟମାରମ୍ଭ ହେବାକୁ ଯାଉଥିବା ଶ୍ରୀ ମିଶ୍ର ଘୋଷଣା କରିଛନ୍ତି। ରାଜ୍ୟର ନୂଆ ବିଜେପି ସରକାର ଛତିଶଗଡ଼ ଭଳି ଓଡ଼ିଶାକୁ ବିକାଶର ଶୀର୍ଷ ସ୍ଥାନରେ ପହୁଁଞ୍ଚାଇବା ସାଙ୍ଗକୁ ଅତିକମରେ ୧୫ବର୍ଷ କାଳ ଶାସନ କରିବ ବୋଲି ସେ ଭବିଷ୍ୟବାଣୀ କରିଛନ୍ତି। ୧୦ ତାରିଖରେ ଭୁବନେଶ୍ୱରର ଜନତା ମୈଦାନରେ ଶପଥ ନେବାକୁ ଯାଉଥିବା ନୂତନ ମୁଖ୍ୟମନ୍ତ୍ରୀ ଜଣେ ଖାଣ୍ଟି ଓଡ଼ିଆ ହେବା ସହିତ ଓଡ଼ିଆ ଭାଷା, ସଂସ୍କୃତି, ସ୍ୱାଭିମାନ, ଐତିହ୍ୟ ଓ ପରମ୍ପରାର ଟେକ ରଖିବା ପାଇଁ ସଦାସର୍ବଦା ତତ୍ପର ରହିବେ ବୋଲି ଶ୍ରୀ ମିଶ୍ର ସୁଚାଇଛନ୍ତି।
ଏଠାରେ ଉଲ୍ଲେଖଯୋଗ୍ୟ ଯେ ଶ୍ରୀ ମିଶ୍ର, ଛତିଶଗଡ଼ର ମୁଖ୍ୟମନ୍ତ୍ରୀ ବିଷ୍ଣୁଦେଵ ସାୟ ଓ ଅନ୍ୟାନ୍ୟ ତୁଙ୍ଗ ନେତୃବର୍ଗଙ୍କ ସହିତ ମିଶି ଓଡ଼ିଶାର ବିଭିନ୍ନ ନିର୍ବାଚନ ମଣ୍ଡଳୀରେ ବିଜେପି ପ୍ରାର୍ଥୀମାନଙ୍କ ସପକ୍ଷରେ ଘମାଘୋଟ ପ୍ରଚାର କରିଥିଲେ। ବ୍ୟକ୍ତିଗତ ଭାବେ ପୁରନ୍ଦର ମିଶ୍ର ଓଡ଼ିଶାରେ ଏକମାସ ଧରି ରହି ନବରଙ୍ଗପୁର, କଳାହାଣ୍ଡି, କୋରାପୁଟ, ସମ୍ବଲପୁର, ବରଗଡ଼, ବଲାଙ୍ଗୀର, ସୁନ୍ଦରଗଡ, ଭୁବନେଶ୍ୱର, ପୁରୀ, ଭଦ୍ରକ ଏବଂ କେନ୍ଦ୍ରାପଡା ଆଦି ଲୋକସଭା ନିର୍ବାଚନ ମଣ୍ଡଳୀ ଅଧିନସ୍ଥ ବିଭିନ୍ନ ବିଧାନସଭା କ୍ଷେତ୍ରରେ ନିର୍ବାଚନୀ ଜନସଭା, ବିଜୟ ସଂକଳ୍ପ ସମାବେଶ,ପଥପ୍ରାନ୍ତ ବୈଠକ,ରୋଡ଼ଶୋ, ଶୋଭାଯାତ୍ରା,ପଦଯାତ୍ରା ଏବଂ ଘରକୁ ଘର ଜନସମ୍ପର୍କ ଅଭିଯାନରେ ଅଂଶ ଗ୍ରହଣ କରି ଦଳର ପ୍ରଚାରର ମଙ୍ଗକୁ ଧରିଥିବାର ସୂଚନା ମିଳିଥିଲା। ସେ ପ୍ରଚାର କରିଥିବା ପ୍ରାୟ ୯୦ ପ୍ରତିଶତରୁ ଉର୍ଦ୍ଧ୍ବ ସ୍ଥାନରେ ବିଜେପିର ପ୍ରାର୍ଥୀମାନେ ଜୟଯୁକ୍ତ ହୋଇଥିବା ଶ୍ରୀ ମିଶ୍ର ପ୍ରକାଶ କରିଛନ୍ତି।
ରାଜ୍ୟର ସଚେତନ ଭୋଟଦାତାମାନେ ତାଙ୍କର ନିବେଦନକୁ ରକ୍ଷା କରି ଓଡ଼ିଆ ସଭ୍ୟତା, ସଂସ୍କାର ଓ ଅସ୍ମିତାର ଘୋର ବିରୋଧୀ,ସାଧାରଣ ଲୋକଙ୍କର ଅହିତକାରୀ ଏବଂ ଭ୍ରଷ୍ଟାଚାରୀ ପଟ୍ଟନାୟକ-ପାଣ୍ଡିଆନ ଯୋଡ଼ି ସରକାରକୁ ଶାସନରୁ ହଟାଇଥିବାରୁ, ଶ୍ରୀ ମିଶ୍ର ରାଜ୍ୟବାସୀଙ୍କ ନିକଟରେ କୃତଜ୍ଞତା ପ୍ରକାଶ କରିଛନ୍ତି।