ସୁବର୍ଣ୍ଣପୁର : (ଅଜିତ କୁମାର ପୁଜାହାରୀ)ଜିଲ୍ଳାରେ ଅନୁଷ୍ଠିତ ଶାରଦୀୟ ଦୁର୍ଗାପୂଜା କୁ ଶାନ୍ତି ଶୃଙ୍ଖଳା ଓ ବ୍ୟବସ୍ଥିତ ଭାବେ ପାଳନ କରିବା ନିମନ୍ତେ ଆଜି ଜିଲ୍ଲାପାଳ ଶ୍ରୀମତୀ ଅନ୍ୟା ଦାସ ଙ୍କ ଅଧ୍ୟକ୍ଷତା ରେ ପ୍ରଶାସନ, ପୋଲିସ ବିଭାଗ ଓ ଜିଲ୍ଲାର ପୂଜା କମିଟି ଙ୍କୁ ନେଇ ଏକ ପ୍ରସ୍ତୁତି ତଥା ସମନ୍ୱୟ ବୈଠକ ଅନୁଷ୍ଠିତ ହୋଇଯାଇଛି। ଚଳିତ ବର୍ଷ ଜିଲ୍ଲାର ବିଭିନ୍ନ ପୁର ପଲ୍ଲୀ ତଥା ସହରାଞ୍ଚଳ ରେ ପ୍ରାୟ ୭୧ ଗୋଟି ପୂଜା ପେଣ୍ଡାଲ ରେ ମାଁ ଙ୍କ ମୃଣ୍ମୟୀ ପ୍ରତିମା ପୂଜା ପାଇବେ।ଏହି ପୂଜା ସମୟ ବିଶେଷ କରି ଷଷ୍ଠୀ ଠାରୁ ଦଶମୀ ଅଥବା ବିସର୍ଜନ ପର୍ଯ୍ୟନ୍ତ ଜିଲ୍ଲାର ବିଭିନ୍ନ ଗ୍ରାମ ତଥା ସହରରେ ପୂଜା ସମ୍ୱନ୍ଧୀୟ ଆନୁସଙ୍ଗିକ କାର୍ଯ୍ୟକ୍ରମ ମାନ ଚାଲୁରହିବ ଏଣୁ ଜନ ସମାଗମ କୁ ଦୃଷ୍ଟିରେ ରଖି ସମସ୍ତ ପୂଜା କମିଟି ଆବଶ୍ୟକ ସତର୍କତା ଅବଲମ୍ବନ ସହ ପୂଜା ତଥା ପୂଜା ପେଣ୍ଡାଲ, ମେଳା ଓ ଅନ୍ୟାନ୍ୟ ଆନୁସଙ୍ଗିକ କାର୍ଯ୍ୟକ୍ରମ ନିମନ୍ତେ ଵିଧି ବଦ୍ଧ ପ୍ରଶାସନିକ ଅନୁମତି ନେବାକୁ ବୈଠକରେ ଜିଲ୍ଲାପାଳ କମିଟି ର କର୍ମକର୍ତ୍ତା ଙ୍କୁ ପରାମର୍ଶ ଦେଇଛନ୍ତି। ବିନାନୁମତିରେ ପୂଜା କିମ୍ବା ମେଳା ଉପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ବୈଠକରେ ସୂଚିତ କରାଯାଇଛି l

ଏହି ପରିପ୍ରେକ୍ଷୀରେ ସମସ୍ତ ପୂଜା ପେଣ୍ଡାଲ କମିଟି ପୂଜା ପୂର୍ବରୁ ଡାକବାଜି ଯନ୍ତ୍ର ବ୍ୟବହାର, ଅସ୍ଥାୟୀ ବିଦ୍ୟୁତ ଯୋଗାଣ , ଅଗ୍ନି ନିର୍ବାପକ ସୁରକ୍ଷା ନିମନ୍ତେ ଉପଜିଲ୍ଲାପାଳ ତଥା ସମ୍ପୃକ୍ତ ବିଭାଗ ଠାରୁ ଅନୁମତି ପତ୍ର ନିଶ୍ଚିତ କରିବାକୁ ଜିଲ୍ଲାପାଳ ଶ୍ରୀମତୀ ଦାସ କମିଟି କର୍ମକର୍ତ୍ତା କୁ ପରାମର୍ଶ ଦେଇଛନ୍ତି। ପୂଜା ସମୟରେ ଓ ପରେ ସହର ତଥା ପୂଜା ପେଣ୍ଡାଲ ଗୁଡିକରେ ପରିମଳ ବ୍ୟବସ୍ଥା, ସୁରକ୍ଷା ବ୍ୟବସ୍ଥା ସହ ଜନ ସମାଗମ ଉପରେ ଆବଶ୍ୟକ ପଦକ୍ଷେପ ନିଆଯିବାଉପରେ ବୈଠକରେ ଆଲୋଚନା ହୋଇଥିଲା। ଲୋକ ଗହଳି କୁ ଦୃଷ୍ଟିରେ ରଖି ପ୍ରତ୍ୟେକ ପୂଜା କମିଟି ନିଜ ନିଜ କମିଟି ତରଫରୁ ଆବଶ୍ୟକ ସତର୍କତା ଅବଲମ୍ବନ ପୂର୍ବକ ସ୍ବେଛାସେବୀ ନିୟୋଜିତ ପୂର୍ବକ ଭିଡକୁ ନିୟନ୍ତ୍ରଣ ତଥା ସୁପରିଚାଳନ କରିବାକୁ ପରାମର୍ଶ ଦେଇଛନ୍ତି। କୌଣସି ଅପ୍ରିତିକର ପରିସ୍ଥିତି ସୃଷ୍ଟିର ସମ୍ଭାବନା ବା ଆଶଙ୍କା ଦେଖାଗଲେ ତୁରନ୍ତ ନିକଟସ୍ଥ ପ୍ରଶାସନ ସହ ଯୋଗାଯୋଗ କରିବାକୁ ପରାମର୍ଶ ଦିଆଯାଇଛି ।

ପୂଜା ସମୟରେ ଜିଲ୍ଲା ଅବକାରୀ ବିଭାଗ ତରଫରୁ ଅନୈତିକ ନସା କାରବାରର ଚୋରାଚାଲାଣ ତଥା ସର୍ବସାଧାରଣ ଖୋଲା ଜାଗାରେ କୌଣସି ପ୍ରକାର ମାଦକ ଦ୍ରବ୍ୟ ବ୍ୟବହାର ଉପରେ କଡା ନଜର ରଖିବାକୁ ଗୁରୁତ୍ୱ ପ୍ରଦାନ କରିଛନ୍ତି ଜିଲ୍ଲାପାଳ। ଏହି ସମୟରେ ବିଭାଗ ତରଫରୁ ଆବଶ୍ୟକ ପଦକ୍ଷେପ ନେବା ସହ ଚଢ଼ାଉ ଜୋରଦାର କରିବାକୁ ନିର୍ଦେଶ ଦିଆଯାଇଛି। ଜିଲ୍ଲାରେ ବିଶେଷ କରି ସହରାଞ୍ଚଳରେ ପୂଜା ସମୟରେ ବିଦ୍ୟୁତ ବିଭ୍ରାଟ ଯେପରି ନହେବ ସେଥିପାଇଁ ଆବଶ୍ୟକ ସଜାଗ ରହିବାକୁ ବିଭାଗୀୟ ଅଧିକାରୀଙ୍କୁ ନିର୍ଦେଶ ଦିଆଯାଇଛି । ଜରୁରୀ କାଳୀନ ବ୍ୟବସ୍ଥା ପାଇଁ ପ୍ରତ୍ୟେକ କମିଟି ନିଜ ନିଜର ପେଣ୍ଡାଲ ତଥା ମେଳା ନିମନ୍ତେ ଆବଶ୍ୟକ ଜେନେରେଟର ବ୍ୟବସ୍ଥା କୁ ନିଶ୍ଚିତ କରିବାକୁ ପରାମର୍ଶ ଦିଆଯାଇଛି। ବିଦ୍ୟୁତ ଯୋଗାଯୋଗ କୁ ବ୍ୟବସ୍ଥିତ ଓ ନିଶ୍ଚିତ କରିବା ନିମନ୍ତେ ପ୍ରତ୍ୟେକ ପୂଜାକମିଟି ସେମାନେ ବିଦ୍ୟୁତ ବିଭାଗ ଠାରୁ ଅସ୍ଥାୟୀ ଆବଶ୍ୟକ ବିଦ୍ୟୁତ ଯୋଗାଣ ପାଇଁ ଅନୁମତି ନେବାକୁ ନିଶ୍ଚିତ କରିବାକୁ ଜିଲ୍ଲାପାଳ ପରାମର୍ଶ ଦେଇଛନ୍ତି। ଜିଲ୍ଲା ତଥା ସହରରେ ହେବାକୁ ଥିବା ଦୁର୍ଗା ପୂଜା ପାଳନ ସମୟରେ ଶାନ୍ତି ଶୃଙ୍ଖଳା ଓ ସୁରକ୍ଷା ତଥା ଟ୍ରାଫିକ ବ୍ୟବସ୍ଥା ନିମନ୍ତେ ନିଆଯାଇଥିବା ପଦକ୍ଷେପ ଉପରେ ଆରକ୍ଷୀ ଅଧିକ୍ଷକ ଶ୍ରୀ ସାହୁ ବୈଠକରେ ଆଲୋକପାତ କରିଥିଲେ। ଚଳିତ ବର୍ଷ ଜିଲ୍ଲାରେ ସମୁଦାୟ 71 ଗୋଟି ପୂଜା ପେଣ୍ଡାଲ ର ଆୟୋଜନ ହେଉଥିବା ସୂଚିତ କରି, ସମ୍ବେଦନଶୀଲ ଅଞ୍ଚଳ ଗୁଡିକରେ କଡା ବ୍ୟବସ୍ଥା ନିଆଯାଇଥିବା ପ୍ରକାଶ କରିଥିଲେ।

କୌଣସି ପ୍ରକାର ଗଣ୍ଡଗୋଳ କିମ୍ବା ଅପ୍ରୀତିକର ପରିସ୍ଥିତି ପାଇଁ ପୋଲିସ ପ୍ରଶାସନ ଦ୍ୱାରା ଆବଶ୍ୟକ ପେଟ୍ରୋଲିଙ୍ଗ ସହ ପୋଲିସ ବଳ ନିୟୋଜନ ଉପରେ ସୂଚିତ କରିଥିଲେ। ତତ ସହ ପୂଜା ସମୟରେ ବିଭିନ୍ନ ଫାଷ୍ଟ ଫୁଡ ଠେଲା ଦୋକାନ, ଜଳଖିଆ ଦୋକାନ, ହୋଟେଲ ପ୍ରଭୁତି ରେ ଖାଦ୍ୟ ଯାଞ୍ଚ କରିବା ନିମନ୍ତେ ଆବଶ୍ୟକ ପଦକ୍ଷେପ ପାଇଁ ବିଭାଗୀୟ ଅଧିକାରୀଙ୍କୁ ନିର୍ଦେଶ ଦିଆଯାଇଛି । ପୂଜା ସମୟରେ ଓ ପରେ ସହର ରାସ୍ତା ଘାଟ, ମେଳା ପଡିଆ ପ୍ରଭୁତି ସ୍ଥାନରେ ଅଳିଆ ଆବର୍ଜନା କୁ ସଫାକରିବା ସହ ପରିମଳ ନିମନ୍ତେ ଆବଶ୍ୟକ ଯତ୍ନବାନ ହେବାକୁ ନିର୍ବାହୀ ଅଧିକାରୀ ପୌରପରିଷଦ ଙ୍କୁ ପରାମର୍ଶ ଦିଆଯାଇଛି, ତତସହ ରାତିରେ ଜନ ସାଧାରଣଙ୍କ ଯିବା ଆସିବା କୁ ସୁଗମ ତଥା ସୁରକ୍ଷିତ କରିବା ନିମନ୍ତେ ସହରରେ ଲାଗିଥିବା ଷ୍ଟ୍ରିଟ ଲାଇଟ ଗୁଡିକୁ ପୂର୍ଣ୍ଣ କାର୍ଯ୍ୟକ୍ଷମ କରିବାକୁ ନିର୍ଦେଶ ଦିଆଯାଇଛି।
ଜିଲ୍ଲାପାଳ ସୁବର୍ଣ୍ଣପୁର ଜିଲ୍ଲାରେ ଶାରଦୀୟ ଦୁର୍ଗାପୂଜା ପାଳନକୁ ଶାନ୍ତି ଶୃଙ୍ଖଳା ର ସହ ଖୁସିରେ ପାଳନ କରିବାକୁ କହିବା ସହ ସମସ୍ତ ପୂଜାକମିଟି ନିଜନିଜ ସ୍ତରରେ ଆବଶ୍ୟକ ସଚେତନତା ତଥା ବ୍ୟବସ୍ଥା କୁ ନିଶ୍ଚିତ କରିବା ସହ ସହଯୋଗ କରିବାକୁ ପରାମର୍ଶ ଦେଇଥିଲେ।